ويبقى انت أكيد في مصر

ليلة إستفتاء الرئاسة (أو بالأصح مسرحية الرئاسة) دخلت غرفة حركة كفاية على البالتوك وكانت شبه ممتلئة واستمعت لكلام الناس الذي يخرج من قلوب تحترق من أفعال هذا النظام في نفس الوقت الذي تذاع فيه أغنية “يبقى انت أكيد في مصر” ليل نهار وباستمرار على كافة قنوات التليفزيون المصري، فأخذت أكتب سريعاً في الغرفة بعض الأبيات العفوية لوضع كلمات هذه الأغنية في سياقها الصحيح الذي يعرفه أي مصري أكيد في مصر ، فظن البعض أن ما أكتبه هو قصيدة وطالبوني بها مع أنها لم تكن إلا خواطر قلب مكلوم ولم أقصد بها شعراً،

نشرتها بعد ذلك في ملتقى الإخوان ثم ضُبط ما نقصها من أوزان وانتشرت بعد ذلك فى كثير من منتدياتالشبكة ؛ وها هي ..

لما تبص تشوف سجّان …… عمال يحبس في الإخـوان

لما تلاقي الظلم هواية …… وكل الناس بتقول ده كفاية
لما تشوف شعبك مطحون …… سعر كرامته تملِّي يهون
لما تلاقي الناس مخنوقة …… وِحْكوماتهـا بقت أهزوءة

 

يبقى انت أكييييد أكيييد في مصر

لما تلاقي حكومه خايبة …… لكل هموم الشعب ده سايبة

لما تلاقي شعوب محروقة …… والقوانين جاية ومسلوقة 

شفت حكومة سفاحيـن …… للعـمــال والفـلاحيـن

أو بتشوف إعلام كـداب …… عمال بيشجع في خـراب

يبقى انت أكييييد أكيييد في مصر

 

لما تلاقي سجون مليانـة ….. فيها كل الناس الغلبانـــة

إنتخابات فيها وتـزوير …… علشان ينجح شخص حقيـر

واما تلاقي وزير كـداب …… وحكومـة فاتحالــه الباب

أو بتلاقي الزور بقى شايع …… والريِّس للشعب ده بايـع

 

يبقى انت أكييييد أكيييد في مصر

 

لما تشوف مسئول وحرامي …… والمفروض لمكانه حامي

لما تلاقي الرشوه سايدة …… وحكومه مش جايبة فايـدة

لما تشوف مسئول هيموت …… حط وراه إبنه الهلفـوت

شفت الدنيا وفيها بطالة …… وحكومة ع الشعب ده عالة

 

يبقى انت أكييييد أكيييد في مصر

 

لما تلاقي حكومة هايفة …… عايزه تخللي شعوبها خايفة

لما تلاقي وزارة خونة …… عايزة تخللي الشعب ده جُبنا

واما تلاقى ظلم مشيـن …… يوم والتانى يحـارب الدين

واما اتزوَّر استفتاء …… كله بيشتم في أبـوعـــلاء

 

يبقى انت أكييييد أكيييد في مصر

 

لما تقول لمبارك هيـه …… تاخد وجبة وعشرة جنيــه

ورك الفرخة آهو في انتظارك …… شجع ياللا وقول يا مبارك

واما يقوللك ده ابن حلال …… ده الريِّس الجــاي جمال

شفت استفتاء مسرحيــة …… من أسوان لاسكندريـة

واما تشوف طبخ في قوانين …… ويجيبوا الستة وسبعين

 

يبقى انت أكييييد أكيييد في مصر

 

واما يكون ده كلام مش حصر …… دي أمثله تشهد ع العصر

 

يبقى احنا أكييييد أكيييد في مصر